Día da música na Capitol

Co gallo do día europeo da música tivemos a sorte de disfrutar dun espectáculo de ROCK'N'ROLL inesquecible na sala Capitol.
Comezaron os Right Ons (que nin son de dereitas nin das illas Ons) cunha mestura de rock garaxeiro, funk, soul e, ante todo, gañas de pasalo ben e facer bailar ós presentes. Moi correctos e moi cañeros e grazas a iso quentaron ó publico para o prato forte...

... e chegaron the BellRays
Foi sair Lisa e deixar mudos ós das primeiras filas. É todo forza. O seu chorro de voz proxectábase ata dentro do peito dos que escoitabamos nunha Capitol casi chea. Pero non só estaba esta diva do Soul na escena, o batera (Craig) é do mellor que vin, atreveuse con 'solos' de 10 minutos que, lonxe de aburrir, facían tremer a sala. Tony, á guitarra, pégalle con forza e sen tregua, pois non deixaron de encadear tema tras tema sen darmos respiro. A maior complicidade amosarona Bob (o baixo) e Lisa, que sen deixar de rockear toda a noite, deron mostras de ser máis que compañeiros de banda e fixeron un bonito pique de baixo e voz no que, obviamente gañou Lisa e gañamos nós.
Despois de empezar fortísimo, tanto polo rock como polo volume (atronador, aínda pítannos os oidos) o lóxico era que baixaran o ritmo: tarea inútil, o que si fixeron foi darlle máis velocidade e máis gañas de bailar ós nosos cansos pes.
En resume: casi duas horas do mellor Rock and Soul.